يوم بلا نهاية

من كام يوم فاتوا كده عدى عليّ يوم عصيب جدا بركاتى كلها حلت وكل اللى داعى علي دعوته طلعت فى اليوم ده
المفروض انى منتظر بضاعة للمكتب بتاعى (قطع غيار واكسسوار كمبيوتر) البضاعة دى المفروض كانت توصل من قبل العيد لكن اعمل ايه فى شركات الشحن ربنا يهدى الجميع
المهم اليوم ده قررت انى اروح اسيوط استلم الشحن بتاعى (انا ساكن بعيد عن اسيوط بحوالى 60كم يعنى 45 دقيقة بالعربية) فرنيت على واحد حبيبى وقلتله انى رايح معاه اسيوط النهارده علشان هو معاه عربية وبينى وبينكم انا قولت هاستغل الموقف واشيل البضاعة بتاعتى فى العربية عنده واظبط المسائل
الساعة 8 الصبح كنت واقف عنده قدام البيت بنبص على العربية لقينا العجلة على الجنط!! يا حول الله يارب احنا لسه بنقول يا صبح
الواحد لابس هدمة نضيفة وكاوى اللى على الحبل ومظبط نفسه وراشش قزازة البرفان على هدومى

سلمت امرى لله وطلعت الكريك انا وهو وفكينا العجلة وطلعنا الاستبن ويارتنا ما طلعنا الاستبن

اتارى اخوه فرقع منه الاستبن قبل كده وصلحه بس التيل البرانى متخربق يعنى العجلة لو ركبت ما تمشيش كيلو واحد حتى

المهم قولته نركبها ونعكز بيها لحد المشحمة نظبط العجلة ونغيرها

وتم فعلا تغيير العجلة بالعجلة النص عمر دى

جينا نعدى السكة الحديد لقيناها مقفولة فنزلنا من النفق واحنا طالعين من النفق عربية ريحت علينا كسرت الفانوس اللى قدام اشارة وإضائة كمان

قولنا ما علينا هو اليوم شكله زى الفل وتمام التمام

كملنا لحد المشحمة و ظبطنا العجلة وتممنا على كل العجل بتاع العربية

يالا يا ابنى نطلع على اسيوط قالى الحاجة هتيجي معانا اسيوط هوصلها مشوار هناك

طيب يا لا بينا علشان كده احنا اتأخرنا

رحنا جيبنا الست والدته من البيت وخلاص هنطلع على اسيوط لمبة البنزين بتاعت العربية نورت

يييييييييييييييه ايه يا ابنى فى ايه بس مش تشيك على العربية من بالليل ؟؟؟ المهم مطولش عليكم دخلنا البلد تانى علشان نجيب بنزين فولنا العربية واستلمنا السكة واتكلنا على الله

واحنا ما شيين فى امان الله عربية محملة رملة وماشية قدامنا حاجة وقعت منها جت فى الفانوس التانى راحت دشدشته ميت حته الاضاءة والإشارة برده

قولت للواد صاحبى بقولك ايه امشى وما تنطقش واحمد ربنا اننا لسه عايشين لحد دلوقتى وفضلنا ما شيين لحد قبل اسيوط بعشرة كيلو ولقينا لجنة مرور منصوبة وحتة عسكرى ابن ستين فى سبعين واقف فى النص اول ما شاف العربية راح موقفها وواخد مننا الرخص

نزلنا للنقيب اللى ماسك اللجنة الراجل قالنا انتوا الفوانيس عندكم مكسرة الاضاءة والاشارة كمان

يا باشا سعتك دى اتكسرت واحنا ماشيين دلوقتى واحنا هنشترى غيرهم واحنا فى اسيوط

الراجل قعد يفكر شوية وهو بيفكر وباصص على الرخصة لقى الرخصة بتاعت العربية انتهت يوم 14/10/2007 يعنى بقالها حوالى 3 ايام منتهية فراح بصلنا كده وقالنا انتوا باين عليكم عاوزين مخالفة وهتشرفونا النهارده

فى الوقت ده انا كنت سايب الواد صاحبى يتكلم معاه ومسكت الموبيل ونزلت رن على كل اللى اعرفهم ولي كلام معاهم (معاون المباحث , معاون المأمور , ونقيب فى المرور, ونقب فى أمن الدولة ) الاربع موبيلات مقفولة علشان احنا بالصبح بدرى

المهم الواد فضل يتحايل على الظابط لحد ما قاله الحاجة معانا فى العربية ومش عاوزيين نبهدلها , لولا انه سابنا نمشى

وبعد طول عناء وكوارث نازله ترف علينا من الصبح وصلنا والحمد لله اسيوط انزل عند شركة الشحن الاقيها قافلة

فضلت الف حوالين نفسى واقعد شوية فى نت كافييه وارجع للشركة الاقيها لسه ما فتحتش

الضهر اذن روحت صليت الضهر ورجعت لقيت الشركة فتحت بس المسئول عن المخزن لسه ما وصلش

صاحبى بيرن علي انا خلاص خلصت مصالحى هنا ها انت خلصت علشان نروح؟ معلش يا مان انت عدى علي فى المكان الفلانى ده قدام شركة الشحن وانا مستنيك هتلاقينى خلصت بإذن الله

المهم الراجل جه كنت خلاص قربت اخلص استلام

استلمت ودفعت دم قلبى وتقريبا اشهرت افلاسى وركبت معاه ورحنا علشان نعدى على والدته نجيبها معانا ونروح

وفجأة افكرت انى نسيت حاجة مهمة جدا بعد ما خلاص وصلنا تقريبا عن والدته

لف يا ابنى وارجع تانى نيجي نلف نلاقى الطريق فى مشلكة ومحولينه قعدنا نلف بالعربية فى الزحمة فى وسط البلد حوالى 3 كيلو علشان نعرف نوصل للمكان اللى كنا فيه تانى

اخدت الحاجة اللى كنت ناسيها واتكلنا على الله جبنا والدته واستلمنا السكة ومروحين

واحنا ماشيين فى أمان الله بعد كل الكوارث اللى حصلت دى نلاقى اللجنة لسه واقفة

آآآآآآآآخ نسينا الفوانيس بتاعت العربية

ونفس العسكرى الرذل ده وقفنا تانى ياعم ما احنا وقفنا واحنا رايحين وخلصنا مع الظابط

لايمكن لازم تركن وتنزلوا

نزلنا للظابط ياعم الحج احنا ملقيناش فوانيس للعربية وبكرة ان شاء الله هنكون لقيناهم يروح العسكرى الرذل يقوله

ياباشا دول عندهم ستاير فى العربية

الراجل راح ماسك الدفتر على طول وهايعمل مخالفة رحت ماسك الموبيل وبرن على اللى اعرفهم فالظابط قالى بتعمل ايه

قولته هاكلم فلان فى أمن الدولة يمكن يكون يعرف حضرتك علشان حضرتك لو واحد معرفة ليك وعنده نفس المشكلة بتاعتنا هتسيبه يعدى وده بقى امر طبيعى فى بلدنا

راح باصصلى من فوق لتحت وقالى والله عندك حق خد ياعم العربية بتاعتك واتكل على الله انت وهو بس رجاء مش عاوز اشوفكم تانى فى اللجنة علشان هافقد اعصابى

والحمد لله لحد ما روحنا البلد محصلتش اى مشاكل تانى خلاف ان مقطورة واحدة مش شابكة اى حاجة معاها ماشية على 24 عجلة كانت ناويه تتطحن العربية اللى احنا فيها بس اتسترت والحمد لله ووصلنا سالمين إلى أرض الوطن

وده فعلا كان يوم من الايام التى تحفر فى ذاكرت التاريخ

يوم لن ينسى ابدا